حفلة جايكا ...

هلأ شو رح يصير معنا مشاكل أو تئصير بهالحفلة رح نحطوا هون ... مشان اذا عملنا حفلة تانية نكون خلصنا من هي المشاكل مشان نلحئ للمشاكل الجديدة ...
الحفلة بتاريخ 10\09\2007 ....
يالله سمّوا بالله

وهي صارت الحفلة ومشي الحال ..... صار معنا شوية أصص رح نحكيها بالتدريج من البداية وحتى نهاية الحفل ....بسم الله الرحمن الرحيم ..
هلأ اول شي كان الموعد للمتطوعين اللي بدون يلّبسوا الاطفال المكفوفين الساعة 9 ... بس الغريب انو لا الموظفين المسؤولين كانو موجودين ولا المتطوعين اللي بدون يستلمو هالئصة باستنثناء شخصة .... هلأ ما رح نحاسب عالخمس دئايئ والعشر دئايئ بس في عالم ما أجت بنوب ... وبلا ذكر أسماء ... بس رد أجى متطوعين واحد ذكر والثانية انثى .. فانحلت المشكلة وصار في تنين للشباب وتنتين للبنات ... في واحد كان واعدنا بفطور بعد ما نخلص ما أجى بنوب ..

المهم ..
فتنا عند الولاد مستعدين ويا سلام ... وبدنا نبلش نلبسون الأواعي اللي نحنا موعودين انو رح يكون على كل طئم أسم الولد اللي رح يلبسو مشان ما يصير خربطة .. بس الغريب انو الأسماء كانت طايرة .. هلأ لو كانت القياسات متباعدة بين الولاد كان ما في مشكلة بس هنن اربع شباب بيناتون 3 تقريباً نفس الئياس ... يعني هي صحي مو هالمشكلة .. بس يعني كان فينا نوفر شي عشر دئايئ من هاد لابس بنطلون هاد وهاد اخد ئميصي ...أما بقسم البنات فما بعرف شو صار والله ...
هلأ خلصنا من توزيع الأواعي من القسم الفوئاني وأجينا للبواط ... لنتفاجئ انو بوط الطفل محمد كريّم .. كان أكبر بأربع نمر عن رجلو ... علماً انو مجهز أبل يوم ...

بس ربك حميد المستودع فيه بواط .. نزلناه وبدلنالو ياه بنمرة ازبط ... لنتفاجئ انو ما معو قشاط كمان ... المتطوعين عرضوا انو يعطوه شي قشاط من القشط اللي معون .. بس للاسف كانوا كلون كبار .. المهم تدبر قشاط بعدين بجهود من موظفة نشيطة ومشي الحال ..
هلأ بصراحة هي المشاكل انا برأي عادية كيتر ... بس يعني حبيت اذكرها مشان أنو بركي المرة الجاية ما بتصير معنا ...
المهم المشاكل ما خلصت كمّل لئدام بائي المشاكل ...

شلون يعني وين بدنا نحط الاطفال المكفوفين ....
يعني بعد ما خلص اللبس وحطينا هالكلونيا للولاد طبعاً مو ألنا ويا سلام طلبوا منّا ننزلون لتحت ....
هلأ هون صارت معنا مشكلة غليظة الحئ فيها كان عالمتطوعين وانا أولهن بصراحة ... يعني المفروض انو نحنا ما نسمع من حدا غير المنسق اللي متفئين معو ... بس في عالم من اللي كانوا عم يشتغلوا بأمور الحفلة كمان عم يحاولوا ينسقوا ئالولنا خدوا الولاد عالمسرح .. وبس وصلنا عالمسرح ئالولنا مين ئلكون تجيبون ... والمنسقة ئالت رجعوووووووووهن


وردوا مسكونا الجماعة نفسون وئال لك ليش عم ترجعوهن ... ردوا خدوهن لهنيك ...
هون حسيت انو عم نتخورف ئلت خليني أجمع هالتنين اللي عم يشتغلوا فينا ويصطفلوا منون لبعض ويعلئوا مع بعض ... والولاد مالون عرفانين وين بدون يروحوا المهم بعد ما صار شوية نقاشات
تقرر أنو نحطون بقاعة لبين ما يصير الوأت ... يعني الفكرة انو نحنا كان لازم ما نطلعون الا لنشوف المنسقة اللي كانت مستلمة الامور ...

رح اكتفي بكلمة صار تغيب من عالم ... في ناس اعتذرت وصار معها ظروف طارئة انشالله يكون خير ... بس في عالم يمكن ما اعتذرت ... وبس

من دون حكي كتير صار معنا مشكلتين أساسيتين بالمسرح ... أول مشكلة كانت بالستار انو ضل شي 5 دئايئ لنفتح ... وبس خلصوا الولاد من تئديم الغنية كمان نفس الشي طوّل الستار لتسكر والولاد لساتون وائفين وعم يستنوا ...... يا ريت يندرس أمرو
وتاني مشكلة هي المايكرفونات ... كانت بأسوء حالاتها ... وما كان طالع صوت غير غفران ومحمد كريّم ... والاطفال المكفوفين البئية حسوا بهالشي وئالولي يعني نحنا كنّا متل ئلتنا وبس منظر ... بأى عيب علينا ما نكون مجهزين المايكات .... يالله مشان المرة الجاية ..

بحب هني المنتدى باشتراكي فيه
هلأ بالحفل متل ما انذكر انو كان في شويت فوته بالحيط بالتنظيم
صحيح انا شغلتي كانت بالاستقبال بس كنت متل قلتي لانو بالحقيقة المدمات هنن اللي تولو هل مهمة
بس الحفلة مرت ع خير الا قصت الميكروفونات لانو اللي مزبط الميكروفونات قبل بيوم ما اجى
يوم الحفل(ملاحظة: هاد الشخص مو اهمال بس هيك كان اتفاقه انو ما رح يجي يوم الحفل)
بس وين المشكلة انو ما في حدا مدرب ع تشغيل المكروفونات والتحكم بالمكسر فصار تخبيص كتير
انسة الموسيقى حاكيتها بعد الحفل قالت انو قبل بيوم بس من الحفلة قالولها انو الميكروفونات ما بتتحمل طبقة صوت عالية فاضطرت انو تعزف ع اهدى شي وما انسمع عزفها والولاد كان اذا علوا صوتهم رح تنضرب السبيكرات (توش)
والحل لمتل هل مشكلة مرة تانية انو بس ينجاب واحد مختص مهندس صوت
وطبعا في مشكلة بس هي خارجة عن ارادة الجمعية والمتطوعين وهي انو ما في ولا شخصية اجت باسم الوزارة!!!!!!!!!!!!!!!!!!!!!!!!!!!1

ونحنا منهني حالنا بانضمامك النا سيد كرم ... شو واثق من معجون سنانو
المهم ... شفت على هالشوفة تبع الميكروفونات ... بالله مو شي بيسلئ البدن
اما بالنسبة للوزارة فأكيد عندون ظروفون يا أخي ...